RETHEIHNA

                    Retheihna hi enge? Chu retheihna chuan mihring te nun ah eng harsatna nge a thlen? Harsatna a thlen dan chu mi zawng zawng te hian kan hre vek awm e. A la tawng lo kan awm kher lovang, a then te phei chu chu retheihna chuan a ei hlum thak anga, tin, a then te chu ramtuileilo a siam in nun beidawng in a siam anga thihna kotlang a hnuk hnai in thihna khuarkhurum ah chuan a paih thla ang. Mihring tena kan tawn tur a Pathian min pek a ni. A thu ah kan hmu “ In hma ah nunna leh thihna malsawmna leh anchhia ka dah” a tih kha. Ziaktu pakhat chuan retheihna hi anchhia a ti tawl mai. Thil engkim hi kan ta nitur a Pathian in a min pek a ni a, Tin, Hausakna ti hlu ber tu chu he retheihna hi a ni.

Chu retheihna chu eng nge a nih tih kawng 2 (hnih) in i han sawi dawn teh ang.

1. TISA RETHEIHNA :

                    (Chhungkua ah) :

                    He thil zet hi zawng chhungkaw inlungrual hlei thei lova min siam tu leh mihring nun zawng zawng tibuai tu bul chu a ni chiang mai. Rethei taka chhungkua han awm hi chuan hlim te pawh hi a har duh a sin aw!. Retheihna in chhungkua min han luhchilh tawh tak tak hi chuan Pa ber pawh a lu a hai map zel a, Nu ber in a Pa a zanin tlai thlak tur kan neilo ti chung a Fairel bel an khup thak tawh hi chuan Pa ber tan pawh tihngaihna a vang duh hle thin. Han tlanbo san ngawt theih lah ni silo a, a mangan thlak thin khawp a ni. Thatchhiat vang pawh a ni thei a, tin, thatchhiat loh vang pawh a ni thei hlei hlei bawk a ni. Krismass a lo hnai a Nu leh Pa te tan chuan Lungngaihna a han intan phawt a, fa ten mi fate neih ang an nei ve lovang tih hlau va kum tlaitluana an lo khawl ve tang tang tawh te hmangin fa te duhzawng (chu pawh a tlawm thei ber chi ngei mai) chu an han lei ve a, engtin tin emaw chuan Lal piancham chu an lawm zo ve mai.

                    Mahse kum te alo thar a, fa te school luhna tur buai pui in, neih thinglungkhawng tak meuh in an han inham buai leh a, chutiang reng reng chuan retheihna chuan kum tin mi rethei chhungkua chu a sawisa thin. Aw!! Kan nu leh pa te rilru lo hah thin tur zia kha aw!!.. Thiante neih ang neih ve duh in tap hnap in nu leh pa te kan lo dawr thin kha a nia(h), Hmangaihna vang chauh in nu leh pa te khan kan dil te kha min lo pe thin a lo ni.

                    Chuvang in i lo puitling a hna thawk thei a siamtu in hriselna a pe ve che a nih chuan i nu leh pa te tan khan i theihna hlan ve mawlh rawh. An theihna zawng zawng a itana an nun an lo hman tawh thin avang in. Tin, nu leh pa nei tawh lo te pawh in i unau te tan khan malsawmna i ni thei tih hria in i hun kha ui miah lovin an tan hlan ang che. Chu chu Hmangaihna in a hrin chhuah a ni si. Pathian thu in Mahni unau te hmangaih tur in min ti a ni.

(Thalai te ah) :

                    Hei pawh hi thil tawrh har tak a ni. Thian ten Nula hmeltha pui pui motor a an phur liam zut zut lai a, kawng sir a an tlanliam tur han thlir vung vung hi chuan Ka hausak ve hun ah chuan a aia tha ka la nei ve ang kan ti rilru thin a ni lawm ni kha. Tin ngaihzawng chungchang ah pawh a tu a te mai pawh hian ngaihzawng rethei deuh neih ai chuan a hausa lam zel hi kan duh bawk a, nitin in retheih hlau avangin zirlai in a zirlai a zir thin a, sumdawng in taima tak in a bei tauh tauh thin a, chutiang zel in mahni hma zawn theuh a tih tur awm te kan tih tang tang na chhan bul ber pawh hi retheih kan hlauh vang a ni thin.

                    Tin, ngaihzawng chungchang ah bawk, thenkhat te chu dinhmun in kar hlat lutuk vang in an inthen a, Retheihna vang bawk in nu leh pa te pawn nula tlangval inngaizawng te an pawh then chang a awm thin bawk. Kan thianpa pakhat pawh bialnu a nei ve a, inzui pawh an inzui rei ve, A bialnu chuan nasa takin a hmangaih ve ni pawh in a hria, mahse, an han inhreching tial tial a, an dinhmun a lo inthlau si a, a hmeichhia a nu leh pa ten an pahnih inkar a hem thlak in thu leng vel diklo tak hmang in an inpawtthen  ta mai a ni. A bik in tun lai hun ah chuan mirethei leh mihausa inkar a lo hla tawh em a ni. Chutiang chuan he retheihna hian mihring inhmangaih tak te a lo pawt then tawh a, heilo pawh tamtak sawi tur a awm. Mahse, tun atan chuan duhtawk hrih phawt ang, tichuan, thalai nun pawh hi retheihna hian nasa tak in min lo tibuai thin a ni.

     2. THLARAU RETHEIHNA :

                    Aw!! He thil hi chu retheihna zawng zawng ah hian a pawi ber. He khawvel a kan dam chhung a kan retheihna te hi chu a lo ho e mai, chatuan chatuan a thih hnu piah lam ram a he thlarau rethei tur hi chu keizawng ka ngaingam mawlh lo. Kan dam chhung hian chatuan hi ala intan silo, kan thi anga chatuan chu alo intan anga, Aw!! Avan rei dawn tak em!. Kan Pathian thu in “Rilru a rethei te chu an eng a thawl e, Vanram an ta a ni si a” (Mathaia 5:3) tiin min hrilh a, chu rilru retheihna chu enge kan tih chuan Krista a nun nei tawh ten sual kawng nuam anga lang tam tak tih ve an chak em em, mahse an mahni neitu Pathian tana thil sual ni si, chak ve em em chung pawh a an tih ve duh tlat loh na thinlung rethei kha a ni. Mahse, an chan tur chu Vanram a ni si. He khawvel mihring awm zawng zawng tana neih chak awm ber leh hlu ber a ni. Chutah chuan He khawvel a Rilru a rethei te chu an chawl anga, bang loving “Thisen hlu thisen hlu” ti a zai in Tlantu chu an fak kumkhua tawh dawn a ni. Kan Pathian chuan he khawvel a retheihna lam pang hi a angai pawimawh ber lova, a thil duh ber chu, duh taka a siam mihring te sual lam a tlu tawh, a hnen atanga engmah beisei thei tawh lo nun khawngaih thlak tak chu a Hmangaihna a nasat em vanga a fapa mal neih chhun min pek a, kan tan a thi a a thawh lehna avang a chatuan nun kan lo neih ve na rin hi a ni. Mihring in chatuan a nun kan neih ve theih nan a engmah kan thawh ve tel miah lova Lei leh Van lalber kan tan a a thihna tluk a ropui hi mihring te tan hian a awm lo.

                    He khawvel tisa nun ah i lo rethei a ni maithei a, in chhungkua pawh in lo rethei a ni maithei. Mahse, chung te aia pawimawh zawk chu i thlarau a rethei em? A rethei angem? Tih hi a ni. Lal Isua Krista hi i sual zawng zawng tlen fai nan itan a thi a ni tih hi ring tawp la, i thlarau rethei tur chhandam rawh. Nangmah kha i pawimawh ber a tumah inthawhsak theih a nilo. Chuvangin he khawvel nawmsakna tur ngaihtuah a nitin a mahni hmalam theuh a ke kan pen lai hian nitin in i thih hun tur i hnaih hret hret tih hria la, A chhandam che tih pawm la ring la amah pan rawh. He khawvel a retheihna hi chu a rei dawn lo, Lal Isua Krista tan rinawm tak in awm reng la nakin ah kut a sak loh Van khawpui mawi ah chatuan in i la leng dawn nia.